ИВАНОВ НЕ МОЖЕ ДА БИДЕ ПРЕТСЕДАТЕЛ ПО ЗАВРШУВАЊЕТО НА МАНДАТОТ

Одредбите поврзани со престанокот на мандатот на претседателот на Републиката се содржат во Уставот на Република Северна Македонија. Членот 82 од Уставот определува дека во случај на престанок на мандатот на претседателот по сила на Уставот, до изборот на нов претседател на Републиката, функцијата претседател на Републиката ја врши претседателот на Собранието на Република Северна Македонија.

Што се однесува до Владата, член 93, став 5 од Уставот определува дека Владата на која и престанал мандатот поради распуштање на Собранието, останува на должност до изборот на нова Влада.

Претседателот на Собранието на РСМ, Талат Џафери, изјави дека доколку не биде постигнат одѕив од 40%, покрај функцијата претседател на Собранието на РСМ, тој ќе треба да ја врши и функцијата претседател на Републиката. Оваа прилика тој ја искористи и да ги повика граѓаните да излезат и да гласаат на вториот круг од изборите. Во интервју дадено за МИА, поранешниот претседател на Уставниот суд, Трендафил Ивановски, го потврди ова, наведувајќи дека до изборот на нов претседател на државата, претседателот на Собранието ги врши неопходните функции на претседател на државата.

Од ова произлегува дека толкувањето на одредбите поврзани со престанокот на мандатот на претседателот на Републиката и неговиот наследник преку правна аналогија со одредбите поврзани со престанокот на мандатот на Владата е погрешно зашто Уставот веќе предвидел механизам во случај на престанок на мандатот на претседателот на државата. Оттаму, ваквите шпекулации претставуваат лажна вест и очигледно е дека се креирани за политички цели.