На 02.04.2020 порталот Инфомакс објави текст со наслов: „(ФОТО) КOРOНAВИPУCOТ МУ ГО OДЗEДE ЖИВOТOТ: Cемејството на актерот Бјелогрлиќ во шoк“Линк до оригиналната статитија тука.
Објавениот текст е клик бејт. Насловот и фотографијата на актерот Драган Бјелогриќ, предизвикуваат погрешен впечаток кај читателот дека од коронавирус починал познатиот актер, а неговото семејство е во шок.
Насловот и фотографијата наведуваат на едно, а текстот кој следи во продолжение е малку поразличен и ја открива вистината. Во текстот под овој наслов, сепак се наведува за тоа кој е починатиот: „Српските медиуми денеска на големо пишуваат за cмpттa на најдобриот пријател на претседателот Александар Вучиќ како и роднината на актерот Драган Бјелогрлиќ од кoрoнaвиpyc. “
Вистина е дека актерот Драган Бјелорлиќ е жив. Починатиот е негов роднина. Нејасно е зошто на ваков начин е презентирана веста за личност која не и е позната на македонската јавност.
Светот е исправен пред предизвикот кој го наметнува пандемијата од Ковид 19. Сите се вознемирени. Токму затоа, сензитивноста на новинарите кога известуваат за информациите врзани за коронавирусот, од суштинско значење е да биде издигната на највисоко професионално ниво.
Во вакви вонредни околности, недозволиво е јавноста да биде наведувана погрешно, особено кога станува збор за трагедија. Медиумите мора да бидат особено внимателни и професионални, како и да ги почитуваат основните новинарски стандарди без отстапки.
