Деновиве актуелна тема е проектот за враќање на дел од ДДВ, мерка која беше најавена уште во предизборната програма на сега владеачката партија, а стартуваше на 1 јули, оваа година. Целта на оваа мерка е да се вратат парите кај граѓаните и намалување на сивата економија и даночното затајување. Со тоа граѓаните и управата да станат партнери во неформалната економија.Сите медиуми известуваат за стартот на овој проект, за начинот и постапката на повратот на сметка на граѓаните, за роковите и слично.Сепак граѓаните се соочуваат со многу прашања за тоа како може да го остварат ова свое право, бидејќи претставува новина во нашата економија.Тимот на F2N2 се обиде да обезбеди одговори на одредени прашања кои би биле од интерес на граѓаните и да ја информира јавноста. Одговорите на следните прашања се обезбедени од официјални лица во УЈП, а произлегуваат од Законот за враќање на дел од данокот на додадена вредност на физичките лица.
Кој има право на враќање на дел од ДДВ?
Право на враќање на дел од ДДВ има секое физичко лице со навршени 15 години возраст, кое поседува валиден документ за идентификација, регистрирано е како корисник на системот на
Е-ПДД на УЈП и поседува трансакциска сметка кај носител на платен промет во Република Северна Македонија.
Од кои фискални сметки не може да се оствари правото на враќање на дел од ДДВ?
Фискална сметка чиј вкупен промет надминува над 30000 денари,
Фискална сметка која е сторнирана;
Фискална сметка за која е издадена сметкопотврда, фактура или друг документ издаден кон правно лице, трговец поединец, физичко лице кое врши самостојна дејност и физичко лице регистрирано за цели на данокот на додадена вредност.
Фискални сметки кои се издаваат заедно со сметките од лицата кои извршуваат континуиран промет и за кои се предвидени последователни плаќања( испорака на струја, вода, телефонски услуги, греење ладење и слично).
Од кои фискални сметки граѓаните имаат право на враќање на дел од ДДВ?
Право на враќање на дел од ДДВ граѓаните имаат од сите фискални сметки издадени согласно
Законот за регистрирање на готовинско плаќање за купени добра и користени услуги кои подлежат на ДДВ, согласно
Законот за ДДВ:
Угостителски и туристички услуги;
Адвокатски и нотарски услуги;
Храна и лекови;
Апарати за домаќинство, бела техника, ИТ опрема,технологија и мобилни апарати;
Облека, чевли, акцесоари;
Градежни услуги кои не надминуваат 500 евра (за услуги над 500 евра во денарска противредност се врши банкарско плаќање преку трансакциска сметка, а тоа не е предмет на поврат);.
Освен од фискалните сметки погоре наведени во точка 2, за кои со
Законот за враќање на дел од данокот на додадена вредност на физичките лица е предвидено дека правото на враќање не се остварува.
Во контекст на претходното прашање се наметнува и следново:
Дали следува враќање на дел од ДДВ од издадени фискални сметки за здравстевени и болнички услуги?Согласно
Законот за ДДВ пропишано е даночно ослободување за здравствените услуги, односно за истите не се пресметува ДДВ (за овие услуги не се плаќа данок, па според тоа не следува ни поврат).Во оваа категорија не влегуваат услугите од козметички салони и салони за масажа, услуги од лица кои применуваат нетрадиционални методи на лекување и ветеринарни услуги. Фискални сметки за купени лекови
може да се користат за поврат на ДДВ, бидејќи лековите се оданочуваат со повластена даночна стапка од 5%.
Како се остварува правото на враќање на дел од ДДВ?
Правото се остварува со скенирање на бар-кодот од фискалната сметка преку апликацијата
Мој ДДВ која е достапна на Google Play Store, а се очекува деновиве да биде достапна и на Apple Store за корисниците на IOS оперативниот систем. За најава на апликацијата граѓаните ќе ја користат истата е-пошта и лозинка од корисничкиот профил на
Е-ПДД.Висината на повратот изнесува 15% од данокот на додадена вредност искажан во поединечната фискална сметка.Рок за остварување на ова право е 10 дена од издавањето на фискалната сметка.Правото може да се оставри само еднаш за една иста фискална сметка.Враќањето на дел од данокот се врши на трансакциската сметка на граѓанинот во рок од 60 дена по истекот на календарското тромесечје во кое е издадена фискалната сметка.Во апликацијата е предвидено граѓаните да имаат преглед за извршениот промет и износот на повратот од фискалната сметка која е пријавена и одобрена од УЈП.
Како граѓаните кои немаат паметни телефони ќе го остварат своето право на враќање на дел од ДДВ?
За сите граѓани кои имаат потреба од подршка во целиот процес, како што се повозрасните граѓани и граѓаните од социјално ранливите категории, Управата за јавни приходи е целосно подготвена да им излезе во пресрет, со поставени киоск апарати, бар-код читачи и паметни телефони во 36 организациони единици.
Каде може да се пријави неиздавање на фискална сметка?
Како и досега неправилности се пријавуваат на телефонската линија 198, со писмен допис во УЈП, во Контакт центарот на број 0800 33 000 (само за фиксен оператор) или на
02/32 53 200 и на инфо мејлот на УЈП
[email protected].
КЛИКНИ ЗА ПОГОЛЕМА СЛИКА
